କରୋନାରେ ସଂକ୍ରମିତ ହୋଇଥିବା ଲୋକ ସାବଧାନ ରହିବା ଆବଶ୍ୟକ। ଏକ ନୂତନ ଅଧ୍ୟୟନରେ ଦାବି କରାଯାଇଛି, ଯେଉଁମାନେ କରୋନାରେ ସଂକ୍ରମିତ ହୋଇଥିଲେ ସେମାନଙ୍କ ଜୀବନ ପ୍ରତି ଅଧିକ ବିପଦ ରହିଛି। ଅନୁସନ୍ଧାନକାରୀମାନେ କହିଛନ୍ତି, କୋଭିଡ୍-୧୯ ରେ ସଂକ୍ରମିତ ହୋଇଥିବା ବ୍ୟକ୍ତିମାନଙ୍କଠାରେ ସାମାନ୍ୟ ଲକ୍ଷଣ ଦେଖାଯାଇଥିଲେ ମଧ୍ୟ ସେମାନଙ୍କର ହୃଦଘାତ ଏବଂ ମୃତ୍ୟୁ ହେବାର ଆଶଙ୍କା ଅଧିକ ରହିଛି।
‘ହର୍ଟ’ ପତ୍ରିକାରେ ପ୍ରକାଶିତ ଅଧ୍ୟୟନରେ କୁହାଯାଇଛି, କରୋନା କାରଣରୁ ଡାକ୍ତରଖାନାରେ ଭର୍ତ୍ତି ହୋଇଥିବା ଲୋକଙ୍କ ଠାରେ, ଅସଂକ୍ରମିତ ଲୋକଙ୍କ ଅପେକ୍ଷା, ଭେନୋସ୍ ଥ୍ରୋମ୍ବୋମ୍ବୋଲିଜିମ୍ (ଭିଟିଇ) ହେବାର ସମ୍ଭାବନା ୨୭ ଗୁଣ ଅଧିକ। ଯେଉଁମାନେ ଚିକିତ୍ସା ପାଇଁ ଡାକ୍ତରଖାନାକୁ ଯାଇ ନାହାଁନ୍ତି, ସେମାନଙ୍କ ଠାରେ ଭିଟିଇ ବିକଶିତ ହେବାର ସମ୍ଭାବନା ଅସଂକ୍ରମିତ ଲୋକଙ୍କ ତୁଳନାରେ ତିନିଗୁଣ ଅଧିକ। ଭିଟିଇ ହେଉଛି ଏକ ଏପରି ସ୍ଥିତି ଯେଉଁଥିରେ ରକ୍ତ ଜମାଟ ବାନ୍ଧିଯାଏ।
ଅନୁସନ୍ଧାନକାରୀମାନେ କହିଛନ୍ତି, ଯଦି ଏହି ଜମାଟି ବଡ ହୋଇଯାଏ କିମ୍ବା ଏହାର ଚିକିତ୍ସା କରା ନ ଯାଏ ତେବେ ଏହା ମୃତ୍ୟୁର କାରଣ ହୋଇପାରେ। ଲଣ୍ଡନର କ୍ୱିନ୍ ମେରି ୟୁନିଭରସିଟିର ଅନୁସନ୍ଧାନକାରୀମାନେ କହିଛନ୍ତି, କୋଭିଡ ସଂକ୍ରମଣ ହେତୁ ଡାକ୍ତରଖାନାରେ ଭର୍ତ୍ତି ହୋଇଥିବା ଲୋକଙ୍କର ହୃଦଘାତ ହେବାର ୨୧ ଗୁଣ ଏବଂ ଷ୍ଟ୍ରୋକ୍ ହେବାର ସମ୍ଭାବନା ୧୭ ଗୁଣ ଅଧିକ ରହିଛି। ସେମାନଙ୍କର ମଧ୍ୟ ଆଟ୍ରିଆଲ୍ ଫାଇବ୍ରିଲେସନ୍ (ଅନିୟମିତ ହୃଦୟ), ପେରିକାର୍ଡାଇଟିସ୍ (ହୃଦୟର ପ୍ରଦାହ) ଏବଂ ହୃଦଘାତ ହେବାର ସମ୍ଭାବନା ଅଧିକ। ଅନୁସନ୍ଧାନରୁ ଜଣାପଡିଛି, ହୃଦରୋଗ ଏବଂ ମୃତ୍ୟୁ ହେବାର ସବୁଠାରୁ ବଡ ବିପଦ ସଂକ୍ରମଣର ପ୍ରଥମ ୩୦ ଦିନ ମଧ୍ୟରେ ଘଟିଥାଏ, କିନ୍ତୁ ପରେ ମଧ୍ୟ କିଛି ସମୟ ପାଇଁ ଏହାର ବିପଦରେ ରହିଥାଏ।