କମିଶନରଙ୍କ ଆଚରଣ ଓ ଉଚ୍ଚାରଣକୁ ପସନ୍ଦ କରୁନି ବିଜେଡି

ଓଡିଶା ଫାଷ୍ଟ ( ବ୍ୟୁରୋ) : ପୁଲିସ କମିଶନର ଶୁଧାଂଶୁ ଷଡଙ୍ଗୀଙ୍କ ଆଚରଣ ଓ ଉଚ୍ଚାରଣ ବିଜେଡି ନେତାଙ୍କୁ ପସନ୍ଦ ଆସୁନାହିଁ । ଏମିତିକି ତାଙ୍କ କାମରେ ସନ୍ତୁଷ୍ଟ ନଥିବା କହିଛନ୍ତି । ରାଜମହଲ ଛକରେ ଟ୍ରାଫିକ ନିୟମକୁ ନେଇ ଜନତା ଓ ପୁଲିସ ମଧ୍ୟରେ ହୋଇଥିବା ଖଣ୍ଡଯୁଦ୍ଧ ପାଇଁ ସରକାର ତାଙ୍କୁ ଦାୟୀ କରିଥିଲେ । ମାତ୍ରାଧିକ କାର୍ଯ୍ୟାନୁଷ୍ଠାନ ପାଇଁ ତାଙ୍କୁ ମୁଖ୍ୟମତ୍ରୀ ବିରକ୍ତି ପ୍ରକାଶ କରିଥିଲେ । ନିକଟରେ  ରୋଡ ରୋମିଓଙ୍କୁ ସାବାଡ଼ କରିବାକୁ 3 ତାରିଖର କମିଶନରେଟ୍ ପୁଲିସ ପକ୍ଷରୁ ରାଜଧାନୀର 30 ଅନୁଷ୍ଠାନରୁ 246 ଜଣ ଯୁବତୀଙ୍କୁ ଏସପିଓ(ସ୍ୱତନ୍ତ୍ର ପୁଲିସ ଅଫିସର) ଭାବେ ନିଯୁକ୍ତି ଦିଆଗଲା । ସ୍କୁଲ, କଲେଜ ଏବଂ କର୍ମକ୍ଷେତ୍ରରେ ମହିଳାମାନେ ସାମନା କରୁଥିବା ଅତ୍ୟାଚାରର ଦମନ ପାଇଁ ସେମାନଙ୍କୁ ପୁଲିସ କ୍ଷମତା ଦିଆଗଲା । ‘ୱିମେନ୍ ଏମପାୱାରମେଣ୍ଟ ଫର୍ ଜେଣ୍ଡର ସେନସିଟିଭି ପୁଲିସିଂ’ କାର୍ଯ୍ୟକ୍ରମ ଜରିଆରେ ଏହି ବ୍ୟବସ୍ଥା ହୋଇଥିବା କୁହାଗଲା । କମିଶନରେଟ୍ ପୁଲିସର ଆଖି ଓ କାନ ଭାବେ ସେମାନେ କାମ କରିବେ ବୋଲି କମିଶନର୍ ସୁଧାଂଶୁ ଷଡ଼ଙ୍ଗୀ କହିଥିଲେ ।

ଆୟୋଜିତ ସ୍ୱତନ୍ତ୍ର ଉତ୍ସବରେ ଶ୍ରୀ ଷଡଙ୍ଗୀ କହିଥିଲେ ଯଦି ପୁଅ ରୋଷେଇ କରିଜାଣନ୍ତି ନି ତେବେ ଝିଅମାନେ ତାଙ୍କୁ ବାହା ହୁଅନି।   କମିଶନରଙ୍କ ବକ୍ତବ୍ୟର ଏହି ଭିଡ଼ିଓ ଭାଇରାଲ୍ ହେବା ପରେ ଭୀଷଣ ପ୍ରତିକ୍ରିୟା ସୃଷ୍ଟି ହୋଇଛି । ସୋସିଆଲ୍ ମିଡ଼ିଆରେ ତାଙ୍କୁ କଡ଼ା ଭାଷାରେ ସମାଲୋଚନା କରାଯାଉଛି ।

ବିଜେଡ଼ି ମୁଖପାତ୍ର ଡ. ଲେନିନ୍ ମହାନ୍ତି ମହିଳା ଏସପିଓ ନିଯୁକ୍ତି ଏବଂ କମିଶନରଙ୍କ ରୋଷେଇ ଉକ୍ତିକୁ ସମାଲୋଚନା କରିବା ସହ କାହିଁକି ଖାଲି ମହିଳା ଏସପିଓ ନିଯୁକ୍ତି ବୋଲି ପ୍ରଶ୍ନ କରିଛନ୍ତି । ଲିଙ୍ଗଗତ ସମାନତା କୁହାଯାଉଥିବା ବେଳେ କମିଶନରଙ୍କ ପଦକ୍ଷେପକୁ ନାପସନ୍ଦ କରିଛନ୍ତି । କମିଶନରଙ୍କ ରୋଷେଇ ଉକ୍ତିକୁ ସମାଲୋଚନା କରି କହିଛନ୍ତି, ଯେଉଁ ପୁରୁଷ ରୋଷେଇ ଶିଖିନି, ତା ମାନେ ସିଏ ମହିଳାଙ୍କୁ କ’ଣ ସମ୍ମାନ ଦିଏନି? ଏହି ବାର୍ତ୍ତା ସମାଜକୁ ସଂଗଠିତ କରିବନି, ପରନ୍ତୁ ଭାଙ୍ଗିଦେବ ବୋଲି ସତର୍କ କରାଇଥିଲେ ।  ତେଣୁ କମିଶନରଙ୍କ ଚାକିରି ଯେ କେତେବେଳେ ଚାଲିଯାଇପାରେ କହିହେବନାହିଁ।