ଶୀତ ଅଧିବେଶନରେ ବିଧାନସଭାରେ ବାର ସାବରକରଙ୍କ ଫଟୋକୁ ଉତ୍ତେଜନା ଦେଖିବାକୁ ମିଳିଛି । କର୍ଣ୍ଣାଟକ ବିଧାନସଭାରେ ବୀର ସାବରକରଙ୍କ ଫଟୋ ଉନ୍ମୋଚିତ ହୋଇଥିଲା । ବିରୋଧୀ ଦଳର ନେତା ସିଦ୍ଧରମୈୟା ଏବଂ ଅନ୍ୟ କଂଗ୍ରେସ ବିଧାୟକମାନେ ବିଧାନସଭା ବାହାରେ ଏହାକୁ ନେଇ ବିରୋଧ ଆରମ୍ଭ କରିଥିଲେ । ଏ ନେଇ ବାଚସ୍ପତିଙ୍କୁ ଏକ ଚିଠି ମଧ୍ୟ ଲେଖି ବାଲ୍ମିକୀ, ବାସବନ୍ନା, କନକ ଦାସ, ବିଆର ଆମ୍ବେଦକର, ସର୍ଦ୍ଦାର ବଲ୍ଲବଭାଇ ପଟେଲଙ୍କ ଫଟୋ ଲଗାଇବାକୁ ଦାବି କରିଥିଲେ ।
ଅନ୍ୟପକ୍ଷରେ କର୍ଣ୍ଣାଟକ କଂଗ୍ରେସ ମୁଖ୍ୟ ତଥା ବିଧାୟକ ଡି.କେ ଶିବକୁମାର କହିଛନ୍ତି ଯେ ‘ବିଜେପି ଜାଣିଶୁଣି ଅସୁବିଧା ସୃଷ୍ଟି କରୁଛି, ସେମାନେ ଚାହୁଁଛନ୍ତି ଯେ ଆମର ବିଧାନସଭା କାର୍ଯ୍ୟ ନ ହେଉ । ସେମାନେ ଏହି ଫଟୋ ଆଣିଛନ୍ତି କାରଣ ଆମେ ସେମାନଙ୍କ ବିରୋଧରେ ଦୁର୍ନୀତିର ଅନେକ ପ୍ରସଙ୍ଗ ଉଠାଇବାକୁ ଯାଉଛୁ, ସେମାନଙ୍କର କୌଣସି ବିକାଶ ଏଜେଣ୍ଡା ନାହିଁ, ତେଣୁ ସେମାନେ ଏହି ଫଟୋକୁ ଉନ୍ମୋଚନ କରିଛନ୍ତି ।’
ଏହାର ଜବାବରେ କେନ୍ଦ୍ର ମନ୍ତ୍ରୀ ପ୍ରହଲ୍ଲାଦ ଯୋଶୀ କହିଛନ୍ତି ଯେ ବୀର ସାବରକର ହେଉଛନ୍ତି ଆମ ଦେଶର ସ୍ୱାଧୀନତା ସଂଗ୍ରାମୀ । ସିଦ୍ଧରମୈୟାଙ୍କୁ ପଚରାଯିବା ଉଚିତ ଯେ ‘ଯଦି ସାବରକର ନୁହେଁ, ତେବେ ଦାଉଦ ଇବ୍ରାହିମର ପୋଷ୍ଟର ଲଗାଯିବା ଉଚିତ କି ?’ ସେ କଂଗ୍ରେସକୁ ଆପତ୍ତିଜନକ ରାଜନୀତି କରୁଥିବା ଅଭିଯୋଗ କରି କହିଛନ୍ତି ଯେ ପୂର୍ବ କଂଗ୍ରେସ ଏବଂ ଆଜିର କଂଗ୍ରେସ ମଧ୍ୟରେ ବହୁତ ପାର୍ଥକ୍ୟ ଅଛି, ଆଜିର କଂଗ୍ରେସ ନକଲି ।