ପାକିସ୍ତାନ ପୋଲିସକୁ ଏକ ବଡ଼ ସଫଳତା ମିଳିଛି । ପଞ୍ଜାବର ଆତଙ୍କବାଦ ମୁକାବିଲା ବିଭାଗ ବା କାଉଣ୍ଟର ଟେରୋରିଜିମ ଡିପାର୍ଟମେଣ୍ଟ (ସିଟିଡି) ଆଜି ଅଲ କାଏଦାର ପ୍ରମୁଖ ସଦସ୍ୟ ଅମିନ ଉଲ ହକକୁ ଗିରଫ କରିଛି । ହତ୍ୟା କରାଯାଇଥିବା ଆତଙ୍କବାଦୀ ଓସାମା ବିନ୍ ଲାଡେନର ଜଣେ ଘନିଷ୍ଠ ସହଯୋଗୀ ଭାବେ ହକକୁ ବିବେଚନା କରାଯାଉଛି ।
ପଞ୍ଜାବ ପୋଲିସର ଆତଙ୍କବାଦ ମୁକାବିଲା ବିଭାଗର ମୁଖପାତ୍ର କହିଛନ୍ତି ଯେ, ଆତଙ୍କବାଦ ବିରୋଧରେ ଲଢେଇରେ ଏକ ବଡ଼ ସଫଳତା ହୋଇଛି, କାରଣ ବିଭାଗ ବିଭିନ୍ନ ଗୁପ୍ତଚର ଏଜେନ୍ସିଙ୍କ ସହଯୋଗରେ ପଞ୍ଜାବ ପ୍ରଦେଶରେ ଯୋଜନାବଦ୍ଧ ଅପରେସନ ବେଳେ ହକକୁ ଗିରଫ କରିଛି ।
ପୋଲିସ ମୁଖପାତ୍ର ଆହୁରି ମଧ୍ୟ କହିଛନ୍ତି ଯେ, ୧୯୯୬ ମସିହାରୁ ହକ ଓସାମା ବିନ୍ ଲାଡେନର ଜଣେ ଘନିଷ୍ଠ ସହଯୋଗୀ ଥିଲା ଏବଂ ସେ ସମଗ୍ର ପ୍ରଦେଶରେ ବିଭିନ୍ନ ଆତଙ୍କବାଦ କାର୍ଯ୍ୟକଳାପରେ ସାମିଲ ରହିଥିଲା । ପୋଲିସର ସୂଚନାନୁସାରେ, ହକ ଗୁରୁତ୍ୱପୂର୍ଣ୍ଣ ପ୍ରତିଷ୍ଠାନ ଏବଂ ବ୍ୟକ୍ତିତ୍ୱଙ୍କୁ ଟାର୍ଗେଟ କରିବାକୁ ଚାହୁଁଥିଲା । ପୋଲିସ ମୁଖପାତ୍ର କହିଛନ୍ତି ଯେ ସି.ଟି.ଡି ଭଲ ପ୍ରଦର୍ଶନ କରିଥିଲା ଏବଂ ଅମିନ ଉଲ ହକଙ୍କୁ ଖୋଜିବା ଏବଂ ଗିରଫ କରିବାରେ ସଫଳ ହୋଇଥିଲା ।
ଗିରଫ ଆତଙ୍କବାଦୀଙ୍କ ବିରୋଧରେ ସିଟିଡି ଏକ ମାମଲା ରୁଜୁ କରିଛି ଏବଂ ତାଙ୍କୁ ପଚରାଉଚରା ପାଇଁ ଅଜ୍ଞାତ ସ୍ଥାନକୁ ନିଆଯାଇଛି । ମିଳିତ ଜାତିସଂଘର ଆନ୍ତର୍ଜାତୀୟ ଆତଙ୍କବାଦୀ ତାଲିକାରେ ହକଙ୍କ ନାମ ଅନ୍ତର୍ଭୁକ୍ତ ହୋଇଛି । ପୋଲିସର ମୁଖପାତ୍ର କହିଛନ୍ତି ଯେ, ପାକିସ୍ତାନ ତଥା ସମଗ୍ର ବିଶ୍ୱରେ ଆତଙ୍କବାଦ ମୁକାବିଲା ପାଇଁ ହକଙ୍କ ଗିରଫ ଏକ ପ୍ରମୁଖ ସଫଳତା ।